फोंडा: धारगे-तांबडीसुर्ला येथील भाई गावकर हा युवक अळंबी आणण्यासाठी महावीर अभयारण्यात गेला असता त्याच्यावर अस्वलाने हल्ला केला. आक्रमक झालेल्या अस्वलाच्या तावडीतून कसेबसे सुटका करून त्याने आपले घर गाठले.

उपचारासाठी त्याला प्रथम पिळये येथील आरोग्य केंद्रात दाखल केले होते. मात्र, अस्वलाने केलेल्या जोरदार हल्ल्यामुळे भाई याच्या शरीरावर खोलवर जखमा झाल्याने त्याला गोमेकॉत दाखल केले आहे. जंगलात जाणे धोक्याचे असल्याने लोकांनी सावधगिरी बाळगावी, असे आवाहन वन खात्याने केली आहे.

तीन पिलांसोबत फिरते मादी

स्थानिकांकडून मिळालेल्या माहितीनुसार, या मादी अस्वलाबरोबर तिची तीन छोटी पिल्ले होती. भाई गावकर हा जेव्हा जंगलात फिरत होता, त्यावेळी अचानक त्याच्यासमोर ही अस्वले आली आणि मादी अस्वलाने जोरदार हल्ला केला, असे सांगण्यात आले.