मडगाव: बँक ऑफ इंडियाचा प्रतिनिधी असल्याचे एका भामट्याने भासवून केवायसी फॉर्म भरायचा बाकी आहे असे सांगून एका महिलेच्या बँक खात्यातील २ लाख ५४ हजार रुपये परस्पर काढून त्या महिलेला गंडा घातला. याप्रकरणी मायणा-कुडतरी पोलिस ठाण्यात तक्रार नोंद झाली आहे.

पोलिसांनी हम्मीद मुल्ला या संशयिताविरुद्ध गुन्हा नोंद केला आहे. सध्या पोलिस त्याचा शोध घेत आहेत. पोलिस निरीक्षक अरुण गावस देसाई यांच्या मार्गदर्शनाखाली पुढील तपास सुरू आहे.

आर्ले-राय येथील ४९ वर्षीय महिला तक्रारदार आहेत. फसवणुकीची ही घटना मागच्या वर्षी २२ ऑक्टोबर रोजी घडली होती. संशयिताने या महिलेला मोबाईलवरून कॉल केला.

आपण बॅंक ऑफ इंडियाचा प्रतिनिधी असल्याचे सांगताना तुम्ही तुमच्या बॅंक खात्याचे केवायसी केले नसल्याचे सांगितले. तुमचे खाते गठीत झाल्याचेही सांगताना, ते पुन्हा सुरू करण्यासाठी त्या खात्याची तपशीलवार माहिती त्या संशयिताने घेतली.

आता जो तुम्हाला ओटीपी क्रमांक येईल तो पाठविण्यास सांगितले. त्याच्या बोलण्यावर विश्वास ठेवून तक्रारदाराने बँक खात्याबद्दल सर्व माहिती देताना आलेला ओटीपी क्रमांकही दिला. नंतर संशयिताने महिलेच्या बॅंक खात्यातील २ लाख ५४ हजार ९९६ रुपये काढले.