पेडणे : बैलपार-कासारवर्णे येथे उभारण्यात येणारा जलप्रकल्प हा पेडणे तालुक्याला पाणीपुरवठा करण्यावर लक्ष केंद्रित करून उभारण्‍यात येत आहे. या प्रकल्पाचे काम येत्या डिसेंबरपर्यंत पूर्ण होईल, अशी ग्‍वाही जलस्रोतमंत्री सुभाष शिरोडकर यांनी दिली.

बैलपार येथे बांधण्यात येणाऱ्या जलप्रकल्पाची पाहणी केल्यानंतर शिरोडकर पत्रकारांशी बोलत होते. यावेळी पेडणेचे आमदार प्रवीण आर्लेकर, मांद्रेचे आमदार जीत आरोलकर, माजी आमदार दयानंद सोपटे, जल प्रकल्पाचे मुख्य अभियंते बदानी, पेडणे भाजप अध्यक्ष तुळशीदास गावस, विविध पंचायतींचे सरपंच, पंचसदस्य व ग्रामस्थ उपस्थित होते.

बैलपार जलप्रकल्प हा मोपा विमानतळ व आयुष इस्पितळ नजरेसमोर ठेवून उभारण्‍यात येत आहे. बैलपार नदीचे पाणी मोपा विमानतळासारख्या प्रकल्पाला वापरल्यास शेती, बागायती धोक्‍यात येईल या भीतीने शेतकऱ्यांनी नदीत राहून ‘जलआंदोलन’ केले होते. ही बाब मंत्र्यांच्या निदर्शनास आणून दिल्यावर ते म्‍हणाले की, दर मिनिटाला नदीत हजारो लिटर पाणी वाहून जात आहे. त्याचा उपयोग करुया.