मडगाव : देशातील काही प्रमुख पुस्तक महोत्सवापैकी एक मानला जाणारा कोची येथील 24 वा आंतरराष्ट्रीय पुस्तक महोत्सव 1 ते 10 एप्रिल पर्यंत एर्नाकुलम मैदानात भरणार आहे. यावेळी होणाऱ्या पुरस्कार वितरण सोहळ्याला ज्ञानपीठ पुरस्कार विजेते साहित्यिक दामोदर मावजो (Damodar Mauzo) हे प्रमुख पाहुणे म्हणून उपस्थित राहणार आहेत.

4 एप्रिल रोजी हा पुरस्कार (Awards) वितरण सोहळा होणार असून यावेळी मावजो यांच्या हस्ते प्रो. एम. के. सानू यांना 'बालमणी अम्मा' हा पुरस्कार दिला जाणार आहे.

त्यापूर्वी 2 व 3 एप्रिल रोजी बाल साहित्य सोहळा साजरा होणार असून गोव्याचे राज्यपाल एम. श्रीधरन पिल्लई (P. S. Sreedharan Pillai) हे या सोहळ्याचे उद्घाटन करणार आहेत. यावेळी प्रसिद्ध फ्रेंच बाल साहित्यिक नादीने ब्रानओसमे हे खास निमंत्रित म्हणून उपस्थित राहणार आहेत.

2 ते 6 एप्रिल पर्यंत 'कोची लिटररी फेस्ट' आयोजित केले जाणार असून त्या दरम्यान सुमारे 50 पुस्तकांचे प्रकाशन होणार आहे. यावेळी देशी विदेशी साहित्यिकांशी चर्चा, साहित्य विषयक कार्यशाळा, तसेच अन्य परिसंवाद होणार आहेत.