Indian Super League एटीके मोहन बागानने इंडियन सुपर लीग (आयएसएल) फुटबॉल स्पर्धेच्या प्ले-ऑफ फेरीत जागा मिळविताना रविवारी केरळा ब्लास्टर्सला 2-1फरकाने नमविले. कोलकाता येथे घरच्या मैदानावर पिछाडीवरून विजय साकारत त्यांनी गुण तक्त्यात तिसरे स्थान मिळविले.

सामन्यात दोन गोल करणारा कार्ल मॅकह्यू एटीके मोहन बागानच्या विजयाचा शिल्पकार ठरला. त्याने अनुक्रमे 23 व 71 व्या मिनिटास प्रत्येकी एक गोल केला. सामन्याच्या १६व्या मिनिटास दिमित्रोस दियामांताकोस याने केलेल्या गोलमुळे केरळमधील संघाने आघाडी प्राप्त केली होती.

उत्तरार्धात केरळा ब्लास्टर्सला दहा खेळाडूंसह खेळावे लागले. त्यांच्या के. पी. राहुल याला सामन्यातील दुसऱ्या यलो कार्डमुळे 64 व्या मिनिटास मैदान सोडावे लागले. प्रतिस्पर्ध्यांचा एक खेळाडू कमी झाल्याची संधी एटीके मोहन बागानने साधली.

एटीके मोहन बागानचा हा 19 सामन्यांतील नववा विजय ठरला. त्यांचे 31 गुण झाले असून +5 गोलफरकासह तिसऱ्या स्थानी उडी घेतली. बंगळूर एफसी व केरळा ब्लास्टर्सचेही 31 गुण झाले आहेत, मात्र गोलसरासरी कमी असल्यामुळे त्यांना अनुक्रमे चौथा व पाचवा क्रमांक मिळाला. हे दोन्ही संघ यापूर्वीच प्ले-ऑफ फेरीसाठी पात्र ठरले आहेत. केरळा ब्लास्टर्सचा हा 19 लढतीतील आठवा पराभव ठरला