केपे: सांगे मतदारसंघ परत एकदा ताब्यात घेण्यास भाजपा कार्यकर्ते यशस्वी ठरले. आतापर्यंत पाचवेळा सांगे मतदारसंघाचे लोक प्रामाणिकपणे भाजपाबरोबर राहिले असल्याने यावेळी तरी मंत्रिपद देऊन लोकांचा विश्वास सार्थ ठरवावा, अशी मागणी संगेवासीयांनी केली आहे.

डॉ. प्रमोद सावंत परत एकदा मुख्यमंत्रिपदी विराजमान होणार असल्याचे निश्चित झाले असल्याने सावंत यांनी आपल्या मंत्रिमंडळात सुभाष फळदेसाई यांना स्थान देऊन सांगेवासीयांचा गौरव करावा अशी मागणी लोकांकडून होत आहे.

सांगे मतदारसंघ भौगोलिकदृष्ट्या बराच मोठा आहे. या मतदारसंघात अद्याप बरीच विकासकामे प्रलंबित असल्याने ही कामे मार्गी लावण्यासाठी तसेच युवकांच्या रोजगाराच्या समस्या सोडवण्यासाठी सावंत यांनी फळदेसाई यांना मंत्रिपद द्यावे, अशी मागणी रीवण पंचायतीचे सरपंच सूर्यकांत नाईक यांनी केली आहे. गेली कित्येक वर्षे सांगे मतदारसंघाला मंत्रिपद लाभले नसून, प्रत्येक सरकार सांगेकडे दुजाभाव करीत असल्याची भावना लोकांकडून व्यक्त होत असल्याचे त्यांनी सांगितले.