पणजी: फुफ्फुसाच्या कर्करोगाचे लवकर निदान करण्यासाठी अ‍ॅस्ट्रा झेनेका कंपनीने अत्याधुनिक कृत्रिम बुद्धिमत्ता (एआय) साधनांच्या मदतीने आतापर्यंत ५०,८४२ नागरिकांची तपासणी यशस्वीरीत्या पूर्ण केली असल्याची माहिती आरोग्य मंत्री विश्‍वजित राणे यांनी दिली.

लवकर निदानामुळे उपचार वेळेत सुरू होऊन रुग्णांचे जीवन वाचविण्यास मदत होते. अ‍ॅस्ट्रा झेनेका, आरोग्य संचालनालय आणि क्युअर एआय यांच्यातील सामंजस्य करार आणखी दोन वर्षांसाठी वाढवण्यात आल्याचे देखील मंत्र्यांनी स्पष्ट केले.

या पुढाकाराचा पुढचा टप्पा अधिक व्यापक स्वरूपात राबवण्यात येणार असून आता अधिक नागरिकांची स्क्रीनिंग, रुग्ण ट्रेकिंग प्रणालीचा विस्तार होणार आहे, असे राणे यांनी सांगितले. फुफ्फुसाचा कर्करोग शोधणे हे एक आव्हान आहे. लवकर निदान करण्यासाठी एआय वापर करण्यात येतो. एआय फुफ्फुसातील चिन्हे ओळखण्यासाठी सीटी स्कॅनचे बारकाईने विश्लेषण करून भविष्यात फुफ्फुसाचा कर्करोग होण्याचा धोका कोणाला असू शकतो याचे मूल्यांकन करतो.

आरोग्य कर्मचाऱ्यांसाठी प्रशिक्षण

आरोग्य कर्मचारी व कार्यकर्त्यांसाठी नव्या प्रशिक्षण मोड्यूल्सची अंमलबजावणी देखील करण्यात येणार आहे. ही तंत्रज्ञानाधिष्ठित सर्वंकष प्रक्रिया गोमंतकीय नागरिकांसाठी लवकर निदान आणि उत्तम आरोग्यसेवा सुनिश्चित करेल, असा विश्वास मंत्री राणे यांनी व्यक्त केला.