आसगाव घर मोडतोड प्रकरणातील मुख्य संशयित पूजा शर्मा हिला सशर्त अटकपूर्व जामीन देताना मुंबई उच्च न्यायालयाच्या गोवा खंडपीठाने तिला सोमवार, २२ जुलै रोजी चौकशीसाठी क्राईम ब्रँचच्या ‘एसआयटी’समोर हजर राहण्याचे निर्देश दिले होते. त्यानुसार ती हजर राहण्यासाठी आज, २१ रोजी गोव्यात दाखल झाली. ती आपल्या वकिलांना घेऊन चौकशीसाठी रायबंदर येथील ‘एसआयटी’च्या कार्यालयात हजर राहण्याची शक्यता आहे.

आगरवाडेकर कुटुंबाने पूजा शर्मा हिच्यासह काही बाऊन्सर्सविरोधात पोलिसांत तक्रार दाखल केल्यानंतर चौकशीसाठी तिला समन्स बजावले होते. तिने समन्सची तारीख पुढे ढकलण्याची विनंती करूनही ‘एसआयटी’ने त्याची दखल न घेता दुसरे समन्स बजावल्याने तिने सावध भूमिका घेत अटकपूर्व जामिनासाठी अर्ज केला.

सत्र न्यायालयाने तिचा अर्ज फेटाळला. मात्र, उच्च न्यायालयाने तिला दिलासा दिला. उच्च न्यायालयाच्या आदेशाचे पालन करण्यासाठी तिला उद्या एसआयटी तपास अधिकाऱ्यांसमोर उपस्थित राहणे सक्तीचे आहे.

तिने ‘एसआयटी’ला काहीच माहिती दिलेली नाही. त्यामुळे ती जरी उद्या उपस्थित राहिली तरी काही दिवस तिला चौकशीसाठी एसआयटी कार्यालयात फेऱ्या माराव्या लागण्याची शक्यता आहे.