पणजी, आसगाव येथे घर मोडण्याचा प्रयत्न केल्या प्रकरणातील संशयित पूजा शर्मा हिला सोमवारी (ता. २२) गुन्हा अन्वेषण विभागाने स्थापन केलेल्या विशेष तपास पथकासमोर चौकशीसाठी उपस्थित राहावे लागणार आहे.
न्यायालयाने तिला सशर्त अटकपूर्व जामीन मंजूर केला आहे.
पूजा हिला अटक केली, तर तिची ५० हजार रुपयांच्या जामिनावर मुक्तता करावी, असेही न्यायालयाने अटकपूर्व जामीन अर्जावर दिलेल्या निवाड्यात म्हटले आहे. आसगाव येथील ६०० चौरस मीटर जमीन पूजा हिने खरेदी केली आहे.
त्या जमिनीत असलेले घर पाडण्याचा तिने प्रयत्न केल्याचा आरोप आहे. प्रदीप यांची पत्नी प्रिंशा हिने आपल्या मुलाचे व पतीचे अपहरण झाले होते. तसेच आपले घर मोडण्याचा प्रयत्न झाला, अशी पोलिस तक्रार केली होती. त्यानंतर ही तक्रार आपल्याला मागे घ्यायची आहे, असे लेखी स्वरूपात तिने पोलिसांना कळवले तरी एफआयआर दाखल झाल्याने न्यायालयाच्या परवानगीविना तपासकाम थांबवणे पोलिसांना शक्य झाले नव्हते.
सरकारने या प्रकरणी तपासकाम सुरू ठेवण्याचा निर्णय घेतला. पोलिस अटक करतील या भीतीने पूजा हिने जिल्हा सत्र न्यायालयात अटकपूर्व जामिनासाठी अर्ज केला. तो तेथे नामंजूर झाला.
या निवाड्याला तिने उच्च न्यायालयात आव्हान दिले होते. सुनावणीदरम्यान पूजाच्या वकिलांनी ती घर पाडण्याचा प्रयत्न झाला, तेव्हा किंवा तत्पूर्वी गोव्यात नव्हती, याकडे न्यायालयाचे लक्ष वेधले.
या उलट घर पाडले गेल्यास त्याचा फायदा मालमत्ता विकत घेणाऱ्या पूजा हिलाच होणार आहे, असे सरकारी वकिलांनी नमूद केले.
कट कारस्थान करण्यासाठी किंवा त्याच्या अंमलबजावणीसाठी घटनास्थळी प्रत्यक्ष उपस्थित राहण्याचीच आवश्यकता नसते, असाही युक्तिवाद या निमित्ताने करण्यात आला. तिच्या कोठडीतील चौकशीही आवश्यकता नाही, या विधानाचा आधार न्यायालयाने घेत अटकपूर्व जामीन मंजूर केला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.