Valpoi : सावर्डे येथील सरकारी माध्यमिक विद्यालयातर्फे 8 वी व 9 वी साठी संतांची माहिती या विषयावर भित्तीपत्रक स्पर्धा तसेच इ. 5 वी ते 7 वीच्या विद्यार्थ्यांसाठी आषाढी एकादशीनिमित्त गटवार दिंडी स्पर्धा आयोजित केली होती. सकाळी ज्येष्ठ शिक्षक संतोष बर्वे यांनी आषाढी वारीची परंपरा व उपवासाचे महत्त्व सांगितले. नाट्यकला शिक्षक प्रमोद म्हाडेश्वर यांच्या उपस्थितीत शिक्षकांनी वारीची सुरुवात केली.

विठ्ठलाच्या गजरात सावर्डे परिसर दुमदुमून सोडला. गावात दिंडी फिरून आल्यानंतर विद्यार्थ्यांना माध्यान्ह आहार देण्यात आला.यावेळी सर्व शिक्षकांनी उपवासाचे पदार्थ आणून शाळेत एकादशी साजरी केली. दिंडी मार्गस्थ झाल्यानंतर विद्यार्थ्यांनी शाळेत भित्तीपत्रके लिहून तयार केली.

दोन्ही स्पर्धांचे परीक्षण शारीरिक शिक्षक विश्वजीत फडते गावकर व नाट्यकला शिक्षक प्रमोद म्हाडेश्वर यांनी केले. दोन्ही स्पर्धांचे आयोजन मुख्याध्यापिका सारिका नाईक, सांस्कृतिक कार्यक्रम प्रमुख विनोदिता गावडे यांनी केले.