पणजी: लुथरा बंधूंचा पासपोर्ट निलंबित करण्याची मात्रा चालली आणि ते जाळ्यात सापडले. भारत आणि थायलंड यांच्यात गुन्हेगारी प्रत्यर्पण करार असला तरी पासपोर्टशिवाय एकही दिवस कोणी थायलंडमध्ये राहू शकत नाही असा तेथील कायदा आहे. सदर कायद्याचा भंग लुथरा बंधूंनी करावा यासाठी त्यांचे पासपोर्ट निलंबित करण्याची योजना आखण्यात आली.

गृह मंत्रालयाने तत्काळ ते काम केले आणि त्याची माहिती थायलंडला दिली. थायलंडला पोचल्यावर तेथील व्हिसा त्यांनी घेतला होता. तो पासपोर्ट निलंबित झाल्याने अवैध ठरला. त्यामुळे थायलंड (Thailand) पोलिसांनी त्‍यांना अटक करणे ठरून गेले होते. त्यातच इंटरपोलने नोटीस जारी केल्याने थायलंड पोलिसांचे काम हलके झाले.

थायलंडमध्ये कोणत्याही परदेशी नागरिकाने वैध व खरा प्रवासी दस्तऐवज (पासपोर्ट) न बाळगता त्या देशात राहणे ही कायद्याने दंडनीय बाब आहे. थायलंडचा इमिग्रेशन अधिनियम इ.स. १९७९ हा परदेशी नागरिकांच्या प्रवेश, मुक्काम आणि निर्गमनासंबंधीचा मुख्य कायदा आहे. या कायद्यानुसार कोणत्याही व्यक्तीकडे खरा व वैध प्रवासी दस्तऐवज नसल्यास त्या व्यक्तीस थायलंडमध्ये प्रवेश देणे किंवा येथे राहू देणे मनाई आहे.

असा आहे थायलंडचा कायदा

१) सदर कायद्यातील कलम १२ मध्ये स्पष्ट नमूद आहे की, ज्याच्याकडे खरा व वैध प्रवासी दस्तऐवज नाही किंवा ज्याच्याकडे योग्य प्रवेश परवानगी कागदपत्रे नाहीत, अशा व्यक्तींना थायलंडमध्ये येऊ देणे किंवा थांबण्याची मुभा देणे नियमबाह्य ठरते. अशा व्यक्तींना सीमा तपासणीतच थांबवले जाऊ शकते किंवा देशात राहत असल्यास अटक केली जाऊ शकते.

२) वैध प्रवासी दस्तऐवज किंवा आवश्यक कागदपत्रे नसताना थायलंडमध्ये राहिल्यास, त्या व्यक्तीवर दंडात्मक कारवाई होऊ शकते. त्यात अटक, परत पाठविणे (निर्वासन) किंवा आर्थिक दंड यांचा समावेश होतो. त्यामुळे थायलंडमध्ये कोणत्याही काळासाठी राहायचे असल्यास आवश्यक कागदपत्रांची पूर्तता करणे बंधनकारक आहे.

३) एकंदरीत थायलंडमध्ये प्रवेश करणे व राहणे यासाठी खरा आणि वैध प्रवासी दस्तऐवज तसेच आवश्यक परवानगी असणे अत्यावश्यक आहे. हे नियम देशाच्या सुरक्षेसाठी आणि परदेशातून येणाऱ्या नागरिकांच्या (Citizens) नोंदी व्यवस्थित ठेवण्यासाठी करण्यात आले आहेत. त्यामुळे योग्य कागदपत्रांशिवाय थायलंडमध्ये राहणे हा कायद्याचा भंग मानला जातो.