Electricity Problem: सत्तरी तालुक्यातील ठाणेसारख्या ग्रामीण भागात वीजपुरवठा खंडित होण्याच्या प्रकारांत वाढ होत आहे. त्यामुळे याचा विचार करून पर्येच्या आमदार डाॅ. दिव्या राणे यांनी नवीन वीजवाहिनी घालण्याच्या कामाला मंजुरी मिळवून दिली आहे. यासाठी ‘इन्सुलेटर्स कव्हर कंडक्टर’ असलेल्या नवतंत्रज्ञानयुक्त वीजवाहिन्या घातल्या जाणार आहेत.

ही नवीन पद्धत असून तंत्रज्ञानाचा वापर करून वीजवाहिनी घालण्यात येत आहे. ही वाहिनी सहजासहजी खराब होत नाही.

यासंबंधी माहिती अशी की, वाळपई ते ठाणे पंचायत क्षेत्रात सध्या वीजखांब घालण्याचे काम टप्प्याटप्प्याने सुरू झालेले आहे. एकूण वाळपई ते ठाणेदरम्यान ४५० नवीन खांब घालण्यात येत आहेत. यासाठी एकूण ७ कोटी ५० लाख रुपयांचा निधी मंजूर झाला आहे. ही वीजवाहिनी ११ केव्ही ठाणे सबस्टेशनवर घालण्यात येत आहे. हे काम दोन महिन्यांत पूर्ण होणार आहे.

आता या नवीन वीजवाहिनीमुळे वाळपईबरोबर कोपार्डे, हेदोडे, पाली, नानेली, ठाणे-हिवरे व इतर भागात त्याचा मोठा फायदा होणार आहे. या कामामुळे नागिरकांनी समाधान व्यक्त केले असून स्थानिक आमदार डाॅ. दिव्या राणे यांचे आभार मानले आहे. त्यांच्या प्रयत्नामुळे आज हे शक्य होत आहे. सत्तरीचा विकास करताना ग्रामीण भागात चांगल्याप्रकारे साधनसुविधा पुरविण्याकडे त्यांचे प्रयत्न असतात.