Goa News: सेंट फ्रान्सिस झेवियर यांच्याबाबत अपमानास्पद वक्तव्य करणाऱ्या सुभाष वेलिंगकरांना मुंबई उच्च न्यायालयाने मोठा दिलासा दिला आहे. वेलिंगकर यांनी बीएनएसएसच्या कलम 35 अन्वये नोटीसचे पालन केल्याने उच्च न्यायालयाने सर्व हस्तक्षेप अर्जासह सुभाष वेलिंगकरांची याचिका निकाली काढली. दरम्यान, पणजी अतिरिक्त सत्र न्यायालयाने अटकपूर्व जामीन फेटाळल्यानंतर वेलिंगकरांनी अटक टाळण्यासाठी उच्च न्यायालयात धाव घेतली होती.

पणजी अतिरिक्त सत्र न्यायालयाचे न्यायमूर्ती बॉस्को रॉबर्ट्स यांनी वेलिंगकरांचा अटकपूर्व जामीन फेटाळून लावला होता. एवढ्यावरच न थांबता वेलिंगकरांना पोलिसांसमक्ष हजर राहण्याचे आदेश देखील त्यांनी दिले होते. त्यानंतर न्यायालयीन आदेशाचे पालन करत वेलिंगकरांनी डिचोली पोलिस ठाण्यात हजेरी लावली होती. डिचोली पोलिसांकडून (Bicholim Police) वेलिंगकरांची दोन वेळा कसून चौकशी करण्यात आली होती.

वेलिंगकर प्रकरणात युक्तिवाद!

दरम्यान, वेलिंगकरांच्या अटकपूर्व जामीनावर पणजी अतिरिक्त सत्र न्यायालयात 7 ऑक्टोबर रोजी सुनावणी झाली होती. सुनावणीदरम्यान वेलिंगकरांच्या वकिलाने, 'वेलिंगकर तपास अधिकाऱ्यासमोर हजर होण्याचा धोका पत्करु शकत नाहीत. लोकांच्या दबावाखाली त्यांना पोलीस अटक करतील. ही लोकशाही नाही झुंडशाही आहे असे म्हटले होते. त्यांनी काही गुन्हा केला नाही तर डीएनए टेस्ट करावी ही केवळ मागणी असल्याचे देखील ते पुढे म्हणाले होते.

त्यावर प्रतिवादी पक्षाच्या वकिलांनी 'वेलिंगकरांना सेंट फ्रान्सिस झेवियर यांच्याबाबत आक्षेपार्ह वक्तव्य करुन गोव्यातील सांप्रदायिक सलोखा बिघडवण्याचे काम केले आहे,' असा युक्तिवाद केला होता. तसेच, डिचोली पोलिसांनीही वेलिंगकरांना जामीन नाकारण्यात यावा असा युक्तिवाद केला होता.