Babu Ajgaonkar: मुख्यमंत्री डॉ. प्रमोद सावंत आणि भाजप प्रदेशाध्यक्ष सदानंद तानावडे यांनी आपल्याला दवर्लीत प्रचारासाठी पाठविले होते, असे बाबू आजगावकर सांगतात. पण बेकायदेशीर घरांना क्रमांक देण्यासाठी त्यांना पाठविले होते का, असा सवाल भाजपचे एसटी समाजाचे नेते अँथनी बार्बोझा यांनी आज केला.

दवर्लीचे सरपंच हर्क्युलान नियासो यांना पाठिंबा दर्शविण्यासाठी शुक्रवारी बार्बोझा यांनी दवर्ली पंचायत कार्यालयाला भेट दिली. त्यावेळी प्रसार माध्यमांशी बोलताना बार्बोझा म्हणाले, ज्या जागेवर ही घरे बांधली आहेत, ती जागा ‘१८-क’ खाली अधिसूचित असून अशा जागेचा फक्त शेतीसाठी वापर करता येतो. अशा जागेत ही घरे बांधलीच कशी आणि या बेकायदेशीर घरांना क्रमांक द्या, असा आग्रह आजगावकर कसा करू शकतात, असा सवाल त्यांनी केला.

दवर्ली पंचायतीत बहुतेक पंच सदस्य एसटी समाजाचे असून त्यांना कुणी धमकावल्यास इतर एसटी बांधव गप्प राहाणार नाहीत. बाबू आजगावकर मोठे नेते असतीलही; पण त्यांनी मडगाव आणि पेडण्यापुरतेच राजकारण सीमित ठेवावे. दवर्लीत काय करायचे आणि कोणते निर्णय घ्यायचे ते आमचे आम्ही पाहून घेऊ. आजगावकरांची लुडबूड आम्ही खपवून घेणार नाही, असा स्पष्ट इशारा बार्बोझा यांनी दिला.