मडगाव: मडगाव नगरपालिकेने शहरातील कचरा समस्येवर मात करण्यासाठी आणखी दोन 5 टीपीडी कचरा प्रक्रिया प्रकल्प उभारण्यासाठी वर्क आर्डर जारी करण्याचे ठरविले आहे. त्यासाठी पालिकेला पालिका प्रशासन संचालकांकडून तसेच ‘सुडा’कडून हिरवा कंदील मिळाला आहे.मडगावचे आमदार दिगंबर कामत यांनी शुक्रवारी मडगावातील विविध कामांच्या प्रगतीबाबत जी आढावा बैठक घेतली होती, त्यात हे संकेत मिळाले. ‘सुडा’चे ज्येष्‍ठ प्रकल्प अभियंता मुजावर यांनी पालिकेला सदर दोन प्रकल्पांबाबत पुढे जाण्यास सांगण्यात आल्याकडे लक्ष वेधले.

या बैठकीस नगराध्यक्ष लिंडन परेरा हेही उपस्थित होते. त्यांनी सांगितले की, पालिकेने यापूर्वीच एसजीपीडीए बाजारालगत असा एक प्लांट उभारलेला असून त्याच्या समाधानकारक अहवालाची प्रतिक्षा होती. आता पालिका प्रशासन व ‘सुडा’कडून परवानगी मिळाल्याने घाऊक मासळी बाजारात एक व एसजीपीडीएच्या पार्किंग जागेलगत दुसरा प्लांट उभारण्याबाबत वर्क आर्डर देण्याचा मार्ग मोकळा झाला आहे.

पालिकेच्या सोनसोडो येथील कचरा राशीला लागलेली आग व त्यानंतर सोनसोडो प्रकल्पाची कोसळलेली भिंत यामुळे पालिकेची कोंडी झाली होती. परिणामी त्या प्रकल्पातील ओला कचरा साळगाव प्रकल्पात नेण्याची विनंती घनकचरा महामंडळाला केली होती. दुसरीकडे सोनसोडो प्रकल्पाबाबत कोणताच तोडगा निघत नसल्यानेही पेच निर्माण झाला होता. आता या दोन प्रकल्पांच्या मार्गातील अडसर दूर झाल्याने ते काम त्वरित पूर्ण होईल याकडे पालिकेने लक्ष द्यावे अशी सूचना कामत यांनी सदर बैठकीत केली.