डिचोली: सर्वत्र नरकासूर (Narkasur) करण्याची कामे अंतिम टप्प्यात आली असतानाच, ऐन दिवाळीच्या तोंडावर नरकासूर जाळण्याचा संतापजनक प्रकार डिचोलीत घडला आहे. बोर्डे येथील वडेश्वर बॉयजने तयार केलेल्या नरकासूर प्रतिमेला कोणीतरी अज्ञातांनी आग लावण्याची घटना घडली आहे. या कृत्यामुळे डिचोली (Bicholim) भागात तीव्र प्रतिक्रिया व्यक्त होत आहेत. याप्रकरणी वडेश्वर बॉयजतर्फे डिचोली पोलिसात तक्रारही करण्यात आली आहे. ही आग कोणी आणि कशासाठी लावली, त्याचे निश्चित कारण समजू शकले नाही. मात्र कोणीतरी जाणूनबुजून हे कृत्य केल्याची शक्यता वर्तविण्यात येत आहे.

यासंबंधीची माहिती अशी, की यंदाही बोर्डे वडाजवळ वडेश्वर बॉयज मंडळाच्या बाळगोपाळांनी रात्री जागून आकर्षक नरकासूर प्रतिमा उभी केली होती. नरकासुराचे काम जवळपास 90 टक्के पूर्ण झाले होते. या कामावर हजारो रुपये खर्चही करण्यात आला होता. मात्र शुक्रवारी मध्यरात्री कोणीतरी या नरकासुराला आग लावली. काल शनिवारी सकाळी नरकासूर जळालेल्या अवस्थेत असल्याचे लक्षात आले. त्यावेळी अर्धाअधिक नरकासूर आगीच्या भक्ष्यस्थानी पडला. या प्रकाराबद्दल मंडळाने तीव्र नाराजी आणि संताप व्यक्त करण्यात येत आहे.

नव्याने नरकासूर

तयार नरकासूर जाळल्याने वडेश्वर बॉयज समोर मोठा पेच निर्माण झाला आहे. मात्र मंडळाच्या कार्यकर्त्यांनी न डगमगता पुन्हा नरकासूर प्रतिमा करण्याचे काम हाती घेण्यात आले आहे. सध्या कार्यकर्त्यांकडून नरकासूर करण्याची लगबग सुरु आहे.