Goa News: कायद्याने बंदी असतानाही साखळीतील आमोणे येथील मांडवी नदीपात्रात बेधडकपणे रेतीउत्‍खनन सुरूच आहे. कारवाई टाळण्यासाठी रात्रीच्या अंधाराचा फायदा घेऊन हा बेकायदा व्यवसाय चालत आहे. कारवाई होत नसल्याने रेतीव्यावसायिकांना रान मोकळे मिळाले आहे. दरम्यान, आमोणेसह डिचोली तालुक्यातील अन्य भागांतही बेकायदा रेती काढली जातेय. दिवसभर नदीच्या काठी नांगरून ठेवण्यात येणाऱ्या रेतीवाहू होड्या काळोख पडताच नदीच्‍या पात्रात घिरट्या घालताना दिसून येतात.

रात्री रेतीचा उपसा करताना सरकारी यंत्रणेला सुगावा लागणार नाही याची संबंधीत रेतीव्यावसायिकांकडून ‘व्यवस्थित’ काळजी घेण्यात येते. रात्रभर रेतीउत्खनन परस्पर वाहतूक रात्रीच करण्यात येते. काही व्यावसायिक तर रेती नदीच्‍या काठापासून लांब ठिकाणी शेतजमिनीत साठवून ठेवतात. अशा लोकांवर कोणतीच कारवाई होत असल्‍याबद्दल आश्‍चर्य व्‍यक्त करण्‍यात येत आहे.

अन्‌ रेतीमाफियांना झाले रान मोकळे!

डिचोलीचे तत्कालीन मामलेदार प्रवीणजय पंडित यांनी तालुक्यातील आमोणेसह अन्य भागांतील बेकायदा रेतीव्यवसायाविरोधात धडक मोहीम हाती घेतली होती. खाण आणि भूगर्भ खात्याच्या सहकार्याने त्यांनी अधूनमधून धाडसत्रही सुरू ठेवले होते. धाडीवेळी जप्त करण्यात आलेला रेतीसाठा पुन्हा नदीच्‍या पात्रात टाकण्यात येत होता. या अधूनमधून होणाऱ्या कारवाईमुळे तालुक्यातील रेतीमाफियांची झोप उडाली होती. दरम्‍यान, वर्षापूर्वी मामलेदार पंडित यांची बदली झाल्यानंतर रेतीउत्खननाविरोधातील कारवाई बंद झाली आणि रेतीमाफियांना पुन्हा एकदा रान मोकळे झाले.