पणजी: मुख्यमंत्री डॉ. प्रमोद सावंत आणि आरोग्यमंत्री विश्‍‍वजीत राणे यांची भाजपचे राष्ट्रीय अध्यक्ष जे. पी. नड्डा यांच्या उपस्थितीत केंद्रीय गृहमंत्री अमित शहा यांनी घेतलेल्या बैठकीमुळे राजकीय चर्चेला उधाण आले आहे. नड्डा यांच्या निवासस्थानी सोमवारी रात्री उशिरा ही बैठक झाली. मात्र, या बैठकीत नेमक्या कोणत्या मुद्यांवर चर्चा झाली याची माहिती मिळू शकली नाही. रात्री अकरा वाजेपर्यंत बैठक सुरूच होती, अशी माहिती दिल्लीतील सूत्रांनी दिली.

मुख्यमंत्र्यांनी मंत्रिमंडळाची बैठक आज घेतली आणि ते दिल्लीला जाणार या माहितीला पाय फुटले. मुख्यमंत्री व आरोग्यमंत्र्यांना शहा यांनी दिल्लीला बैठकीला बोलावल्याची वार्ता राज्यात चवीने चर्चिली जात होती. या बैठकीत काय झाले, याविषयी सत्ताधारी गोटातूनच नव्हे तर विरोधकांमध्‍येही उत्सुकता होती.

सावंत व राणे यांच्यात राजकीय स्पर्धा नाही, असे सत्ताधारी गोटातून कितीही सांगण्याचा प्रयत्न केला तरी ती लपून राहिलेली नाही. मुख्यमंत्री आणि आरोग्यमंत्री यांच्यातील राजकीय शीतयुद्धाची चर्चा राजकीय वर्तुळात गेले काही महिने आहे. या पार्श्वभूमीवर अमित शहा यांनी दिल्लीत बोलावलेली बैठक राजकीय समेटासाठी असावी, अशी चर्चा राज्यात सुरू आहे.

गोव्‍याबाबत चर्चा

दिल्लीतील बैठक ही मंत्रिमंडळ फेरबदलासाठी नाही, असे भाजपच्या प्रदेशाध्यक्ष सदानंद शेट तानावडे यांनी स्पष्ट केले.

चार राज्यांच्या विधानसभा निवडणुका आहेत. गोव्याकडे कोकणातील निवडणुकीची जबाबदारी आहे. त्यासंदर्भात या बैठकीत चर्चा होऊ शकते.

याशिवाय राज्यासाठी आवश्यक असणाऱ्या आणि महत्त्वाच्या विषयांवर चर्चा होणार आहे. मंत्रिमंडळ फेर बदलाचा विषय असता तर मलाही बैठकीला बोलावले असते.