पणजी: आगामी गोवा विधानसभा निवडणुकीच्या प्रचाराणे आता जोर धरला आहे. भाजप आपली सत्ता राखण्यासाठी प्रयत्नशील आहे. आतापर्यंत स्थानिक नेत्यांनी देवेंद्र फडणवीस यांच्या साथीने प्रचाराची धुरा सांभाळली होती. मात्र, आता केंद्रीय गृह मंत्री अमित शहा (Amit Shah) राज्यात भाजपचा प्रचार करणार आहेत. ते रविवारी गोवा दौऱ्यावर येणार आहेत. (Amit Shah Goa Electiion News)

रविवारी शहा तीन रॅलींमध्ये सहभागी होणार असल्याची माहिती समोर येत आहे. मिळालेल्या माहितीनुसार, ते फोंडा येथील रॅलीला सायंकाळी 4:30 वाजता संबोधित करतील. पुढे शहा सावर्डे येथे 6:30 वाजता होणाऱ्या रॅलीत सहभागी होतील आणि त्यांची शेवटची रॅली वास्को (Vasco) येथे रात्री 8 वाजता पार पडेल.

या सर्व रॅली कोविड नियमावलीचे पालन करूनच आयोजित केल्या जातील, अशी माहिती समोर येत आहे. याबाबत बोलताना तानावडे म्हणाले होते की , निवडणूक आयोगाने (Election Commission) जारी केलेल्या सर्व नियमांचे पालन करून मोदी, शहा आणि पक्षाचे इतर अनेक ज्येष्ठ नेते गोव्यात पक्षाच्या प्रचार करतील.

आगामी काळात भाजपचे अनेक मोठे नेते गोव्यात प्रचारासाठी येणार आहेत. याबद्दल तानवडे यांनी माहिती दिली होती. ते म्हणाले, केंद्रीय मंत्री नितीन गडकरी (Nitin Gadkari) आणि स्मृती इराणी यांच्यासह भाजपचे राष्ट्रीय अध्यक्ष जे. पी. नड्डा; भाजपचे गोवा निवडणूक प्रभारी देवेंद्र फडणवीस आणि सहप्रभारी जी. किशन रेड्डी आणि दर्शना जरदोश हे गोव्यातील पक्षाच्या निवडणूक प्रचारात सहभागी होणार आहेत.