Dr. Bhimrao Ramji Ambedkar राज्यात साजरी होणारी आंबेडकर जयंती ही समाज कल्याण खात्यातर्फे साजरी होत आली आहे.

यापुढे हा जयंती सोहळा शासकीय उत्सव असेल, असे सांगून लवकरच आंबेडकर भवनाचे काम सुरू करू, अशी ग्वाही मुख्यमंत्री डॉ. प्रमोद सावंत यांनी आज दिली.

डॉ. बाबासाहेब आंबेडकर यांच्या 132 व्या जयंतीनिमित्त पणजीत आंबेडकर गार्डनमधील पुतळ्याला पुष्पहार अर्पण करून मुख्यमंत्र्यांनी अभिवादन केले.

यावेळी सभापती रमेश तवडकर,समाज कल्याणमंत्री सुभाष फळदेसाई, वीजमंत्री सुदिन ढवळीकर, कला आणि संस्कृती मंत्री गोविंद गावडे, भाजपचे प्रदेशाध्यक्ष सदानंद शेट तानावडे, आमदार प्रवीण आर्लेकर, अर्थसचिव कनावेलू जिल्हाधिकारी मामू हागे उपस्थित होत्या.

सरकारी योजना सामान्यांपर्यंत पोहचवा !

या योजना संबंधित लोकांपर्यंत पोहोचाव्यात यासाठी जबाबदार कार्यकर्ते आणि नेत्यांनी सक्रिय होणे गरजेचे आहे. या योजना त्यांच्यापर्यंत पोहोचवण्यासाठी सरकारचा ‘स्वयंपूर्ण मित्र’ प्रत्येक शनिवारी पंचायतीमध्ये उपस्थित असतो.

आपणा सर्वांना विनंती आहे त्यांच्याकडून या समाजासाठीच्या योजना समजून घेऊन त्या लाभार्थीपर्यंत पोहोचवाव्यात,अशा सूचना मुख्यमंत्री सावंत यांनी यावेळी केल्या.