राज्यातील बेरोजगारांना नोकऱ्यांची संधी उपलब्ध करून देण्यासाठी गेल्यावर्षी सप्टेंबर महिन्यात आयोजित केलेला महा रोजगार मेळावा हा नियोजित महाघोटाळा होता, असा आरोप आरटीआय कार्यकर्ते ॲड. आयरिश रॉड्रिग्ज यांनी केला आहे.

या मेळाव्यावर सुमारे 2.61 कोटी रुपये खर्च करण्यात आले. त्‍यासाठी वित्त खात्याची मंजुरीही घेण्यात आली नाही, असा त्‍यांनी दावा केला आहे.

या मेळाव्यातून बेरोजगार गोमंतकियांना किती फायदा झाला, याची श्‍वेतपत्रिका काढण्यात यावी. या मेळाव्यासाठी पुरेसा वेळ असतानाही वित्त खात्याच्या मंजुरीशिवाय मेळावा आयोजित केलेल्या संबंधित अधिकाऱ्यांविरुद्ध कारवाई करण्यात यावी, अशी मागणी रॉड्रिग्ज यांनी केली आहे.

गेल्यावर्षी 8 नोव्हेंबर 2022 मध्ये बेरोजगार उमेदवारांसाठी ताळगाव येथील श्‍यामाप्रसाद मुखर्जी इनडोअर स्टेडियममध्ये महा रोजगार मेळावा आयोजित केला होता. या मेळाव्यासाठी दोन महिन्यापूर्वीच प्रक्रिया सुरू झाली होती. त्यामुळे या मेळाव्यावर येणाऱ्या खर्चाच्या मंजुरीसाठी वित्त खात्याची परवानगी घेण्यास खूप वेळ होता.

मात्र, त्याची मंजुरी न घेताच 2.61 कोटी खर्च करण्यात आले, असे आयरिश यांनी जारी केलेल्‍या पत्रकात म्‍हटले आहे.