Goa Bangalore Flight: सध्या बंगळूरमध्ये तीव्र पाणी टंचाई आहे. लोकांना व्यक्तिगत स्वच्छतेसाठीही पुरेसे पाणी मिळत नसल्याची खबर आहे. अशातच गोवा ते बंगळूर मार्गावर प्रवासासाठी बसपेक्षाही विमानसेवेचा स्वस्त पर्याय उपलब्ध झाला आहे.

नेटकरी बंगळूरला कसे जावे, पाण्याचा टॅंकर घेऊन जावे का? अशी खोचक विचारणा करू लागले असतानाच ‘फ्लाय ९१’ या विमान कंपनीने गोवा ते बंगळूर हा विमान प्रवास १९९१ रुपयांना उपलब्ध केला आहे.

कर्नाटक परिवहन महामंडळाचे बस तिकीट या मार्गावर १ हजार २५७ रुपये तर खासगी बस ९९९ ते २ हजार ७०० रुपये आहे.

असे असताना विमान प्रवासाचा हा स्वस्त पर्याय उपलब्ध करून देण्यात आला आहे. मोपा विमानतळावरून सकाळी ७.५५ वाजता हे विमान निघते तर बस सायंकाळी बंगळूरला निघतात.

नव्याने सुरू केलेल्या विमानसेवेला लोकप्रियता लाभावी, यासाठी कंपनीने ही सवलतीतील तिकीट योजना लागू केली असली तरी बंगळूरमधील पाणी टंचाईच्या तोंडावर तिची मोठी चर्चा समाज माध्यमांवर सुरू झाली आहे.

बंगळूरमध्ये गेलात, तर दुसऱ्या दिवशी पाण्याअभावी गाशा गुंडाळावा लागेल, येताना तेवढीच स्वस्त तिकीट मिळेल काय? अशीही विचारणा अनेकजण करू लागले आहेत.

हैदराबाद, जळगाव, पुणे येथे ही विमान कंपनी आपली सेवा सुरू करणार आहे. त्या ठिकाणीही बससेवेपेक्षा कमी दरात विमानसेवा सुरु होईल का? याविषयी निश्चितपणे कुतूहल निर्माण झाले आहे.

लक्षद्वीपला थेट विमान सेवा

72 आसनी या विमानसेवेची बससेवेशी निश्चितपणे स्पर्धा होणार असल्याचे आताच दिसते. मोपा येथील मनोहर आंतरराष्ट्रीय विमानतळ केंद्रस्थानी ठेवून ही विमान कंपनी आपली सेवा विस्तारणार आहे.

पुढील महिन्याच्या मध्यावर लक्षद्वीपलाही नियमित विमानसेवा मोपावरून सुरू होणार आहे. सध्या केवळ कोचीवरूनच लक्ष्यद्वीपला विमानसेवा आहे