पणजी: प्रसिद्ध स्टँड-अप कॉमेडियन आणि अभिनेते एहसान कुरेशी यांचा गोव्यातील एका टॅक्सी चालकासोबतचा संवाद सध्या सोशल मीडियावर तुफान व्हायरल होत आहे. गोव्यातील विमानतळाबाहेर घडलेल्या या घटनेने राज्यामध्ये प्रदीर्घ काळापासून प्रलंबित असलेल्या 'ओला-उबर' (Ola-Uber) टॅक्सी वादाला पुन्हा एकदा तोंड फोडले आहे. एहसान कुरेशी यांनी टॅक्सी चालकाला अतिशय मोकळेपणाने विचारलेल्या प्रश्नांमुळे पर्यटकांची बाजू आणि स्थानिक चालकांच्या अडचणी या दोन्ही गोष्टी समोर आल्या आहेत.

या व्हायरल व्हिडिओमध्ये एहसान कुरेशी एका स्थानिक टॅक्सी चालकाला विचारतात की, "माझे अनेक मित्र गोव्याला येतात आणि तक्रार करतात की येथे ओला किंवा उबर का चालत नाही? तुम्ही लोक त्यांना येऊ का देत नाही?" यावर त्या टॅक्सी चालकाने अतिशय स्पष्टपणे आपली बाजू मांडली. चालकाच्या मते, गोव्यामध्ये जवळपास 25000 स्थानिक टॅक्सी चालक आहेत. जर ओला किंवा उबरसारख्या कंपन्या आल्या, तर त्यांचा मोठा हिस्सा कमिशनच्या रुपात कंपनीकडे जाईल. "आम्ही आमच्या मेहनतीने जेवढे कमावतो, त्यात आम्ही समाधानी आहोत. आमचा धंदा आम्ही बाहेरच्या कंपन्यांना का द्यावा?" असा सवाल चालकाने उपस्थित केला.

कुरेशी यांनी पुढे विचारले की, जर तुम्ही तुमची गाडी ओला-उबरला जोडली तर तुम्हाला दुप्पट धंदा मिळेल, असे वाटत नाही का? त्यावर चालकाने उत्तर दिले की, कमिशन कापल्यामुळे फायदा कमी होतो आणि त्यापेक्षा स्थानिक टॅक्सी युनियनच्या माध्यमातून काम करणे आम्हाला परवडणारे आहे. या संवादानंतर कुरेशी यांनी प्रेक्षकांना उद्देशून सांगितले की, "बाहेरुन येणाऱ्या लोकांना वाटते की गोव्याचे (Goa) टॅक्सी चालक दादागिरी करतात, पण त्यांची ही स्वतःची समस्या आणि आर्थिक गणिते आहेत. ते त्यांच्या कमाईत आनंदी आहेत." या व्हिडिओमुळे गोव्यातील टॅक्सी माफियांवरुन होणारी टीका आणि स्थानिक लोकांचे उपजीविकेचे प्रश्न यावर पुन्हा एकदा नवी चर्चा सुरु झाली आहे.