कर्नाटक आणि आंध्र प्रदेश या राज्यांपाठोपाठ आता गोव्यातही हवेचे कमी प्रदुषण करणाऱ्या फटाक्यांचा वापर करण्याचा विचार केला जात आहे. कौन्सिल फॉर सायंटिफिक अँड इंडस्ट्रियल रिसर्च (सीएसआयआर) ने असे 'हरित फटाके' बनवले आहेत. पारंपरिक फटाक्यांच्या तुलनेत या हरित फटाक्यांमुळे 30 टक्के कमी हवा प्रदुषण होते.

राज्याच्या जैवविविधता मंडळाच्या सोमवारी बैठक झाली. यात पर्यावरण मंत्री नीलेश काब्राल (Nilesh Cabral) यांनी गोवा राज्य प्रदुषण नियंत्रण मंडळाच्या (जीएसपीसीबी) सदस्यांना हरित फटकांच्या विचार करण्याबाबत सुचविले.

सार्वजनिक बांधकाम मंत्री काब्राल म्हणाले की, हवेचे प्रदुषण कमी कसे करता येईल, याबाबत बैठकीत चर्चा झाली. आम्ही प्रदुषण नियंत्रण मंडळाला याबाबत विचारायचे ठरवले आहे. त्यावेळी एका सदस्यांनी हरित फटाक्यांचा पर्याय उपलब्ध असल्याचे सांगितले. लवकरच याबाबत मार्गदर्शक तत्वे जारी केली जातील. त्यातून हरित फटाक्यांचे फायदे सांगितले जातिल.

सीएसआयआरने बनवलेले हरित फटाके कमी प्रदुषण करणारे आहेत. त्यासाठी वापरलेला कच्चा माल ही कमी प्रदुषण करणार आहे. त्यामुळे यातून वातावरणात बाहेर पडणारे घटक प्रदुषणासाठी कमी कारणीभूत ठरतील. याशिवाय या फटाक्यांचा आवाजही पारंपरिक फटाक्यांच्या तुलनेत 110-125 डेसिबलपर्यंतच असेल. पारंपरिक फटाक्यांचा आवाज 160 डेसिबलपर्यंत असतो.

गोव्यात बांबूपासून बनविण्यात येणारे फटाके फोडण्याचीही परंपरा आहे. अशा परंपरा पुनरूज्जीवीत करण्याची गरज आहे, असेही प्रदूषण मंडळाचे एक सदस्य म्हणाले.