पणजी : राज्यात मुदत संपलेल्या 175 पंचायतींवर संचालनालयाने अखेर सरकारी अधिकाऱ्यांना पंचायत प्रशासक म्हणून नेमण्याची घोषणा शुक्रवारी केली. दोन दिवसाच्या सुट्टीनंतर आता हे प्रशासक आज सोमवारी आणि उद्या मंगळवारी आपल्या प्रशासक पदाचा ताबा घेणार आहेत. (Morjim Panchayat News)

पंचायत संचालनालयाने राज्यात 175 पंचायतींवर राज्य सरकारच्या विविध सेवेत कार्यरत असलेल्या सरकारी अधिकाऱ्यांची प्रशासक म्हणून नेमणूक केली आहे. हे अधिकारी आज आपल्या पदाचा ताबा घेतील. सरकारी नियमानुसार, मंगळवार गुरुवार आणि शनिवारी हे सरकारी अधिकारी संबंधित पंचायतींमध्ये प्रत्यक्ष हजर राहून पंचायतींचे कामकाज पाहणार आहेत. दरम्यान पंचायत मंत्री माविन गुदिन्हो यांनी ही प्रशासक जास्तीत जास्त सहा महिन्यासाठी नेमली असून तत्पूर्वी राज्यात ओबीसी संदर्भातील माहिती गोळा करण्यात येईल येईल आणि तातडीने राज्यातील पंचायतींच्या निवडणुका घेण्यात येतील अशी माहिती दिली आहे. (Goa Panchayat)