पणजी: नैसर्गिक जैवविविधतेचे माहेरघर असणारे पश्चिम घाटातील भगवान महावीर अभयारण्य व मोले राष्ट्रीय उद्यान परिसरात राष्ट्रीय महामार्ग ४-ए चे रुंदीकरण, रेल्वे रुळाचे दुपदरीकरण तसेच नवीन विद्युत प्रसारकाच्या बांधकामाला परवानगी देण्यात आली आहे. यासाठी सुमारे ५५ हजार झाडांची कत्तल करण्यात येणार असून हजारो नैसर्गिक जीवांचा अधिवास हिसकावून घेतला जाणार आहे. यासाठी राज्यभरातून विरोध होत असून आता बॉलिवूड सेलिब्रिटीसुद्धा त्यांचा विरोध दर्शवित आहेत. अभिनेत्री दिया मिर्झा आणि रिचा चढ्ढा या दोघीनी ट्विट करून मोले वाचविण्यासाठीची विंनती केली आहे. 

काश्मीर असो, आरे अथवा मोलेचा प्रश्न असो आम्हाला वनसंपदा वाचवलेली हवी आहे. सध्या खूप वनसंपदा राहिलेली नसून जर झाडे राहिली नाहीत तर आपण मरून जाऊ आणि हा मृत्यू कोणत्याही प्रकारचे आधार कार्ड किंवा इतर कागदपत्रे मागणार नसल्याचे ट्विट अभिनेत्री रिचा चढ्ढा हिने केले आहे. 
दरम्यान, एका वरिष्ठ महिला पत्रकाराने उचललेल्या मोलेच्या प्रश्नाला खुले समर्थन अभिनेत्री दिया मिर्झा हिने दर्शविले आहे. प्रमुख माध्यमे या प्रकरणाकडे कमी लक्ष देत असून तुम्ही लक्ष दिले यासाठी धन्यवाद असे ट्विट दिया मिर्झा हिने केले आहे. 

या दोन्ही ट्विटच्या समर्थनार्थ कमेंट पडल्या आहेत. प्रकल्पांच्या नावाखाली स्वतःच्या लागेबंध असणाऱ्या कंपन्यांच्या झोळ्या भरण्यासाठी नैसर्गिक संपत्तीचा बळी देण्यात आला. मोप विमानतळाच्या बांधकामाच्या नावाखाली शेकडो झाडांच्या कत्तली केल्या. त्याशिवाय येथील स्थानिक आदिवासी लोकांना जबरदस्तीने स्थलांतरित करण्यात आले. आता आपण शांत राहिलो तर याच इतिहासाची पुनरावृत्ती होईल. आपल्या पुढच्या पिढीच्या वाट्याला जर प्रदूषणविरहीत परिसर यावा असे आपल्याला वाटत असेल, तर आपण ही चळवळ सक्षम पद्धतीने पुढे घेऊन जाणे हे आपले कर्तव्य असल्याच्या अनेक टीका येथे स्थानिकांनी केल्या टीका येथे आहेत.