Actor Arshad Warsi buys Portuguese inspired home in Goa Saligao

आपल्या कॉमेडीने आणि सिरियस अभिनयाने बॉलिवूडमध्ये अर्शद वारसीने वेगळे स्थान निर्माण केले आहे. अर्शदने अलिकडेच गोव्यातील साळगाव येथे एक घर विकत घेतले आहे. पोर्तुगीज बनावटीच्या या घराच्या प्रेमात अर्शद आणि त्याची पत्नी मारीया पडले आहेत. दोघांनाही हे चांगलेच आवडले असून, अर्शदने गोव्यात घर घेण्याविषयी त्याच्या आठवणींना उजाळा दिला आहे.

'मला नेहमीच गोव्यात घर घ्यायची इच्छा होती, पण त्यावेळी उत्पन्नाचे कोणतेही साधन नव्हते. गोवा आणि गोव्यातील लोकांवर माझे नेहमीच प्रेम आहे. गोव्यात घर घेण्याबाबत बोलले तर लोक घर घेण्यापेक्षा हॉटेलमध्ये राहा असे सांगायचे पण, माझी इच्छा होती. पुढे अभिनयात करिअर केले आणि अखेर गोव्यात घर घेण्याचे स्वप्न पूर्ण झाले.'

'मला गोव्यात एक जुने पोर्तुगीज बनावटीचे घर मिळाले आहे आणि ते फारच सुंदर आहे. माझी पत्नी मारीया सध्या या घराला सजवण्यासाठी धडपड करत आहे. आमची त्या घराला आहे तसेच ठेवण्याची इच्छा असून, त्यात अति सजावट करण्यात काहीच अर्थ नाही असे वाटते.' असे अर्शद वारसीने म्हटले आहे. टाईम्स ऑफ इंडियाशी बोलताना अर्शदने त्याच्या भावना व्यक्त केल्या आहेत.

गोवा माझ्यासाठी नेहमीच आवडीचे ठिकाण राहिले आहे. गेल्या 35-40 वर्षांपासून इथे येत आहे. रेल्वे, बस, बाईक, कार, कोकण शक्ती अशा विविध मार्गांनी मी गोव्यात आलोय. येथे विविध बरे-वाईट अनुभव आले आहेत.

नवीन वर्ष आणि ख्रिसमस साजरा करण्यासाठी आम्ही गोव्यात यायचो, येथे आम्ही विविध कार्यक्रमांमध्ये डान्स करायचो. त्यावेळी मी 16-17 वर्षांचा होतो; मारिया आणि मी दोघांनीही अगदी लहानपणीच करिअरला सुरूवात केली. असे अर्शद वारसीने म्हणाला.