सासष्टी: कार्यकर्ता हा कुठल्याही चळवळीचा आधारस्तंभ असतो. कार्यकर्ता सदैव नम्र असायला हवा. त्याला आपण करतो त्या कामाची योग्य जाणीव असायला हवी, असे ज्येष्ठ साहित्यिक पुंडलीक नायक यांनी सांगितले.

कोकणी भाषा मंडळ, गोवा, रवींद्र केळेकार ज्ञानमंदिर आणि सावईवेरेंचा सख्याहरी यांच्या सहकार्याने नित्यानंद नाईक यांच्या स्मरणार्थ आयोजित दोन दिवशीय कार्यकर्ता मेळाव्याच्या उद्‌घाटनप्रसंगी ते बोलत होते. या मेळाव्यात पेडणे ते काणकोणपर्यंतचे सुमारे 55 कार्यकर्ते उपस्थित होते.

मेळाव्याची सुरुवात कोकणी कार्यकर्ते स्व. नित्यानंद नाईक यांच्या तसबिरीला हार घालून झाली. मुख्याध्यापक अनंत अग्नी यांनी स्वागत केले. अन्वेषा सिंगबाळ यांनी प्रास्ताविक केले. गौरांग भांडीये यांनी आभार मानले. ब्रिजेश शेट देसाई यांनी सूत्रसंचालन केले.

पहिल्या सत्रात ‘आम्ही नित्य कार्यकर्ते’ वर डॉ. पूर्णानंद च्यारी यांचे मार्गदर्शन लाभले. दुसऱ्या दिवशी ‘सावईवेरे आणि वळवई परिसरातील चळवळ- यादी आणि अनुभव’ या सत्रात हेमा नायक, महेश नायक, महादेव नायक, प्रकाश नायक, विठ्ठल नायक, राजेंद्र नायक आणि गौतम नायक यांनी अनुभव कथन केले. या सत्राचे संयोजक अनंत अग्नी यांनी केले.