Accidental Death: शिवोली येथील वीज दुर्घटनेत मृत्यू पावलेल्या साहाय्यक लाईनमन कृष्णा पवार याच्या अपघाती मृत्युप्रकरणी संबंधित कनिष्ठ अभियंता तसेच लाईनमनवर कारवाई करण्यात येणार आहे.

या प्रकरणाची सखोल चौकशी करून 15 दिवसांत अहवाल मागवला जाईल. त्यानंतर दोषींवर कारवाई केली जाईल, अशी ग्वाही वीजमंत्री सुदिन ढवळीकर यांनी दिली.

शिवोली येथे गुरुवारी वीज खांबावर चढून दुरुस्ती करताना शॉक लागल्याने कृष्णा पवार यांचा मृत्यू झाला होता. या दुर्घटनेला जबाबदार असलेल्या सर्व कर्मचाऱ्यांची सखोल चौकशी करण्याचे आदेश मुख्य अभियंत्यांना देण्यात आले असून पुढील कार्यवाही सुरू करण्यात आली आहे. कृष्णा पवार यांच्या कुटुंबीयांना न्याय दिला जाईल, असेही ढवळीकर यावेळी म्हणाले.

दिवंगताच्या पत्नीला सरकारी नोकरी

कृष्णा पवार यांच्या पश्‍चात पत्नी आणि एक लहान मुलगी असा परिवार आहे. हे कुटुंब आर्थिकदृष्ट्या निराधार झाल्याने दिवंगत कृष्णा पवार यांच्या पत्नीला अनुकंपा तत्त्वावर सरकारी नोकरी देण्यासाठी कार्यवाही करण्यात येईल, अशी ग्वाही मंत्री ढवळीकर यांनी दिली.