पणजी: मुख्य सचिव पुनीतकुमार गोयल यांच्या हळदोणा येथील कथित बेकायदा भूखंड खरेदी प्रकरणी काँग्रेसने आज (गुरुवारी) राज्यपाल पी. एस. श्रीधरन पिल्लई यांची भेट घेतली आणि आठ दिवसांत याप्रकरणी गोयल यांच्यावर कारवाई करावी. अन्यथा राजभवनावर मोर्चा काढण्याचा इशारा दिला.

काँग्रेसचे प्रदेशाध्यक्ष अमित पाटकर यांच्या अध्यक्षतेखालील शिष्टमंडळाने गुरुवारी सकाळी राजभवनावर जाऊन राज्यपाल पी.एस. श्रीधरन पिल्लई यांची भेट घेतली आणि पक्षाच्या वतीने निवेदन सादर केले.

याप्रसंगी विरोधी पक्षनेते युरी आलेमाव, तसेच खासदार विरियातो फर्नांडिस म्हणाले की, मुख्य सचिव पुनीतकुमार गोयल यांनी हळदोणा येथे भूखंड खरेदी केला आहे. त्या भूखंड खरेदीप्रकरणी काँग्रेसने आवाज उठविला असून बुधवारी सचिवालयावर मोर्चा काढून त्यांना घेराव घालण्याचा प्रयत्न केला. परंतु पोलिसांनी काँग्रेस कार्यकर्त्यांना अडविले.