Vagator Accident Case: शनिवारी रात्री वागातोर येथे घडलेल्या भीषण अपघातात स्थानिक महिला रेमेडियाना उर्फ रोमी आल्बुकेर्क (56) यांचा दुर्दैवी अंत झाला. यामुळे ड्रंक अँड ड्राईव्हचा मुद्दा पुन्हा एकदा वर आला आहे . दरम्यान याप्रकरणी फोर्ड गाडीचा चालक सचिन कुरूप याला म्हापसा न्यायालयाकडून आता 14 दिवसांची न्यायिक कोठडी सुनावण्यात आली आहे.

आरोपी सचिन कुरूप हा पाच दिवस हणजूण पोलीस कोठडीत होता. काही दिवस हणजूण कोठडीत घालवल्यानंतर काल (गुरुवारी) सकाळी हणजूण पोलिसांकडून त्याला म्हापसा न्यायालयात हजर केले असता न्यायालयाकडून कुरूप याला वरील कोठडी सुनावण्यात आली आहे.

स्थानिकांकडून आरोपीवर कठोर कारवाई करण्यात यावी, अशी मागणी करण्यात येत आहे.

दरम्यान, या अपघातानंतर वाहतूक पोलीस गौरीश परब यांनी गोव्यात येणाऱ्या पर्यटकांना विशेष सूचना केल्या आहेत. ते म्हणाले की, गोव्यात फिरताना मद्यपान करून वाहन चालवणे हा गुन्हा आहे. मोटार वाहन नियम आणि कायद्यांची अंमलबजावणी करण्यासाठी पोलिसांनीआखून दिलेल्या नियमांचे उल्लंघन करणार्‍या व्यक्तींना त्यांच्या कृतीचे परिणाम भोगावे लागतील, तसेच कायद्याचे उल्लंघन करणाऱ्यांविरुद्ध खटले दाखल करण्यात येतील.