केपे: असोलडा येथील निवृत्त मुख्याध्यापकच्या अंगावर पेट्रोल ओतून जिवंत मारण्याचा प्रयत्न केलेल्या अभिषेक हिरेमठ (Abhishek Hiremath) या युवकाने 2018 साली आपल्या शिक्षिकेला दुचाकीची धडक देऊन मारण्याचा प्रयत्न केल्याचे पोलीस तपासात सांगितले आहे.

काकूमडी केपे येथील अभिषेक हिरेमठ हा सध्या केपे पोलिसांच्या ताब्यात आहे.अभिषेक हा शेलडे येथील सरकारी विद्यालयाचा माजी विद्यार्थी असून तो अत्यंत हुशार होता व त्याने या विद्यालयातून दहावीत प्रथम क्रमांक पटकावला होता. दहावीत असताना शिक्षिकेने आपल्याला मारले होते व या कारणाने आपल्याला वर्गात सर्वासमोर शरमेने मान खाली घालावी लागली होती याचा राग आपल्या मनात होता व याच कारणाने 2018 साली सदर शिक्षिकेला दुचाकीची धडक देऊन मारण्याचा प्रयत्न केला होता तो सफल होऊ शकला नव्हता व त्याच कारणाने आपण दिं. 8 रोजी त्यांच्या घराची कौले काडून आत शिरलो व शिक्षिकेच्या पतीला ठार मारण्याचा प्रयत्न केला होता असे हिरेमठ यांनी सांगितले आहे.