गोमेकॉत उपचारासाठी आणलेल्या वास्को चोरी प्रकरणातील संशयित पी. रमेश (50) याने पोलिसांची नजर चुकवून पलायन केले. याप्रकरणी आगशी पोलिसांनी संशयित रमेशविरुद्ध गुन्हा नोंदवला आहे.

तसेच संशयितावर पहारा ठेवण्यात हयगय केल्याप्रकरणी पोलिस कॉन्स्टेबल अशोक अधुर आणि कॉन्स्टेबल गौरेश सातार्डेकर या दोघांना रात्री उशिरा निलंबित केले. हा आदेश दक्षिण गोवा पोलिस अधीक्षकांनी जारी केला.

दोन महिन्यांपूर्वी संशयित रमेश याने पार्किंगमधील कारची काच फोडून सुमारे 2.50 लाखांची रक्कम लंपास केली होती. दोन दिवसांपूर्वी पुन्हा तो चोरी करण्यासाठी आला असता, तक्रारदाराने त्याला एका वाहनाजवळ उभा असलेला पाहिला. त्यानंतर पाठलाग करून त्याला पकडले आणि वास्को पोलिसांच्या स्वाधीन केले.

त्याने अडीच लाखांच्या चोरीची कबुली दिली होती. याप्रकरणी वास्को पोलिसांत यापूर्वीच गुन्हा नोंद झाला होती. तक्रारदाराने संशयिताची सीसीटीव्ही कॅमेऱ्याच्या फुटेजवरून चोराची माहिती मिळवली होती. त्यामुळेच तो दुसऱ्यांदा वास्कोत आला असता त्याला ओळखणे सोपे झाले.

अटक केल्यावर रमेशने पाय दुखत असल्याची तक्रार केल्याने त्याला चिखली जिल्हा इस्पितळात नेले. मात्र, तेथे एक्स-रे मशीन नसल्याने त्याला गोमेकॉत आणले होते. आज सकाळी श्‍वान पथकाने रमेशचा शोध घेतला. मात्र, श्‍वान जवळच झाडांमध्ये जाऊन थांबले. रमेशच्या शोधासाठी लुकआऊट नोटीस जारी केली आहे.