काणकोण : नुवे-श्रीस्थळ येथील राजन रमेश वेळीप (21) या युवकाचा खड्डे-बाळ्ळी येथे झालेल्‍या अपघातात मृत्‍यू झाला. वेळीप हा दुचाकीवरून काणकोणला येत असताना समोरून येणाऱ्या चारचाकी वाहनाने त्‍याला जोरदार धडक दिली. यात गंभीर दुखापत झाल्‍याने त्‍याचा मृत्‍यू झाला आहे. राजनच्‍या पार्थिवावर आज दुपारी नुवे येथे अंत्यसंस्कार करण्यात आले. तो उत्कृष्ट क्रिकेटपटू होता. त्याच्या पश्‍‍चात आई-वडील, बहीण असा परिवार आहे. दरम्यान, उपचारासाठी वेळ गेल्याने त्याचा दुर्देवी मृत्यू झाला असल्याचे बोलले जात आहे. (Accidental death of a cricketer from Canacona)

दरम्यान, करमणे दाबाळ येथील रुपा शेट पारकर या महिलेच्या सावर्डे येथे झालेल्या खुनाची घटना ताजी असतानाच आज बुधवारी कुडचडे अग्निशमन दल कार्यालयाच्या जवळ असलेल्या शेतीत आणखी एका इसमाचा मृतदेह आढळून आल्याने परत एकदा कुडचडे शहर चर्चेत आले आहे. सापडलेला मृतदेह 34 वर्षीय पुरुषाचा असून तो आज बुधवारी सकाळी स्थानिकांना आढळून आल्याने ही बातमी सगळीकडे वाऱ्यासारखी पसरली. कदाचित हाही खुनाचाच प्रकार असावा अशी शंका काही जणांनी व्यक्त केली.

दरम्यान पोलिसांनी हा मृतदेह ताब्यात घेतला आहे. ज्याचा हा मृतदेह आहे त्याला दारू प्यायचे व्यसन होते. दारू प्यायलेल्या अवस्थेत तो या भागात पडला असावा आणि त्यातच त्याचा मृत्यू झाला असावा अशी शक्यता पोलिसांनी व्यक्त केली आहे.