Goa Accident: गोव्यातील मोले येथे राष्ट्रीय महामार्ग क्रमांक चारवर खासगी आरामदायक बस आणि इनोव्हा कार यांच्यात मोठा अपघात झाला. सुदैवाने या अपघातात जीवीतहानी झालेली नाही. तथापि, सहा जण जखमी झाले आहेत.

या अपघातात इनोव्हा कारचा चालक जखमी झाला आहे. त्याच्या पायाला जबर मार लागला आहे. तर इनोव्हा कारमधील सहाही जण किरकोळ जखमी झाले आहेत. जखमींना तिस्क येथील पिळये आरोग्य केंद्रात उपचारासाठी पाठविण्यात आले होते.

तिथून एकाला पुढील उपचारासाठी गोमॅकोमध्ये आणण्यात आले आहे. तर तिघांना फोंडा उपजिल्हा रूग्णालयात दाखल करण्यात आले आहे. या अपघातामुळे या मार्गावरील वाहतूक बराच काळ विस्कळीत झाली होती.

खासगी बस बंगळूरहून गोव्याकडे येत होती. तर विरोधी दिशेने येणाऱ्या भरधाव इनोव्हाने बसला जोरदार धडक दिली. इनोव्हा कार वेगात होती. त्यामुळे ड्रायव्हरचे कारवरील नियंत्रण सुटले. भरधाव कार येत असल्याचे पाहून बसच्या ड्रायव्हरने बस आणखी आतल्या बाजूला वळवली.

त्यामुळे समोरासमोर धडक न होता. बसच्या एका कोपऱ्यात इनोव्हाची धडक बसली. तथापि, दोन्ही वाहनांचे या अपघातात मोठे नुकसान झाले आहे.