फोंडा (Ponda): कोडार - निरंकाल येथील दुचाकी व चारचाकी यांच्यामध्ये समोरासमोर झालेल्या अपघातात (Accident case) दुचाकीस्वार गंभीर जखमी झाला असून दुचाकीस्वार मारयान जॉन ॲन्थनी (वय 52, रा. सिल्‍वानगर - फोंडा) यांची प्रकृती चिंताजनक आहे. त्यांना फोंडा उपजिल्हा इस्पितळाच्या डॉक्टरांनी उपचारासाठी गोमेकॉत (GMC) पाठविले आहे.

हा अपघात शनिवारी सकाळी सव्वाअकराच्या सुमारास घडला. दुचाकी डिओ (क्र. जीए 06 एच 6014) बेतोडा मार्गे कोडार निरंकालच्या दिशेने जात होती, तर आर्टिगा कार (क्र. जीए 05 बी 8390) कोडार - निरंकालहून फोंड्याच्या (Ponda) दिशेने जात असता कारच्या पुढील भागाला दुचाकीची जोरदार धडक बसली. दुचाकीचालक कारच्या पुढील भागाखाली सापडल्याने सुमारे शंभर मीटरपर्यंत त्याला फरपटत नेले. तसेच दुचाकी रस्त्याकडेच्या झाडावर जाऊन आदळली. यावेळी दुचाकीस्वार मारयान यांच्या डोक्याला व हातापायाला गंभीर दुखापत झाली. या घटनेचा पंचनामा पोलिसांनी केला असून पुढील तपास सुरू आहे.