पेडणे : मालपे येथून अल्पवयीन मुलीला फुस लावून तिचे अपहरण केल्याप्रकरणी पेडणे पोलिसांनी अनिल रावत (21 रा. मूळ सतना मध्यप्रदेश व सध्या मालपे) याला रविवारी गुरगाव येथून हरियाणा पोलिसांच्या मदतीने अटक केली. तर फूस लावून पळवून नेलेल्या अल्पवयीन मुलीलाही ताब्यात घेतले. संशयित एमव्हीआर कंपनीत मजूर म्हणून काम करतो.

पोलिसांनी दिलेल्या माहितीनुसार मूळ बिहार येथील व एमव्हीआर कंपनीत मजूर म्हणून काम करणाऱ्या एकाने अनिल रावतने आपल्या अल्पवयीन मुलीला पळवून नेल्याची तक्रार पेडणे पोलिस ठाण्यात दाखल केली होती. तक्रार दाखल होताच पेडणे पोलिसांनी तपास सुरू केला.

तपासात संशयित गुरगाव, हरियाणा येथे पळवून नेलेल्या मुलीसमवेत असल्याची माहिती मिळाली. त्यानंतर पेडणे पोलिस ठाण्याचे निरीक्षक विक्रम नाईक यांच्या नेतृत्वाखाली पोलिस निरीक्षक नवीन देसाई,सुमेधा नाईक,पोलिस कॉस्टेबल सागर खोर्जुवेकर यांचे पथक हरियाणा येथे गेले. तेथे हरियाणा पोलिसांच्या सहकार्याने संशयित व मुलीला ताब्यात घेतले.

पोलिस अधीक्षक शोभीत सक्सेना व पेडणे पोलिस उपअधीक्षक सिध्दांत शिरोडकर यांच्या मार्गदर्शनाखाली पेडणे पोलिस पुढील तपास करत आहेत.