मडगाव : सुरवातीला जिल्हा पंचायतीत एक तर नंतर विधानसभा निवडणुकीत गोव्यात दोन आमदार निवडून आणणाऱ्या आम आदमी पक्षाने येणाऱ्या पंचायत निवडणुकीसाठीही तयारी सुरू केली असून त्या दृष्टीने आज कुंकळ्ळी मतदारसंघात त्याची चाचपणीही सुरू झाली.

आज वेळ्ळीचे आमदार क्रूझ सिल्वा यांच्या अध्यक्षतेखाली बैठक होऊन या मतदारसंघात पंचायत निवडणूक लढविण्यास कोण इच्छुक आहेत त्याची माहिती त्यांनी घेतली. पंचायत निवडणुकीत पक्ष थेट भूमिका घेणार की अन्य काही हे जरी ठरले नसले तरी या निवडणुकीद्वारे पक्षाचा गाव पातळीवर विस्तार करण्याचे ठरले अशी माहिती मिळाली आहे.

यावेळी आपचे कार्यकारी सचिव प्रशांत नाईक, महिला विभागाच्या उपाध्यक्ष पेट्रीसिया फेर्नांडिस, कुंकळ्ळी गटाचे सरचिटणीस जॉर्सन फेर्नांडिस, युवा आघाडीचे नेते वैभव फळदेसाई हे उपस्थित होते.

यावेळी लोकसभा निवडणुकीच्या तयारीला लागा असे आमदार सिल्वा यांनी सांगितले. सध्या दक्षिण गोव्यात आपचे वेळ्ळी आणि बाणावली येथे दोन आमदार निवडून आलेले असून इतर काही मतदारसंघातही पक्षाला चांगली मते पडली आहेत. ही स्थिती दक्षिण गोव्यात पक्षासाठी पोषक असून लोकसभेत फायदा होऊ शकतो असे सिल्वा यांनी सांगितले.

आपण वेळ्ळी येथील आमदार असलो तरी कुंकळ्ळी मतदारसंघातही आपण लक्ष देणार असून सरकारी योजनांचा कुंकळ्ळीच्या लोकांना लाभ मिळवून देण्याचा आपला प्रयत्न असेल असे सिल्वा यांनी सांगितले.