Goa AAP Dissolves: आम आदमी पक्षाने त्यांची गोवा कार्यकारिणी शनिवारी तत्काळ प्रभावाने बरखास्त केली. राज्यात पक्षाला अनेक धक्के बसल्यामुळे गोवा युनिट विसर्जित करण्याचा निर्णय घेतला आहे, असे आपने म्हटले आहे.

गोव्यातील आपचे सर्व प्रमुख पदाधिकारी दिल्लीला गेले आहेत. आप पक्षाचे राष्ट्रीय समन्वयक आणि दिल्लीचे मुख्यमंत्री अरविंद केजरीवाल यांच्यासोबत त्यांची बैठक झाल्याचे समजते.

आगामी लोकसभा निवडणुकीच्या दृष्टीने तयारी करण्यासाठीच हा निर्णय झाल्याचे समजते. 2022 च्या गोवा विधानसभा निवडणुकीत 'आप'ला केवळ एक जागा जिंकता आली होती.

नवीन संघटनात्मक रचनेची घोषणा लवकरच केली जाईल, असे आपने म्हटले आहे. तथापि,, प्रदेशाध्यक्ष अमित पालेकर आपल्या पदावर कायम राहणार आहेत.

आम आदमी पक्षाच्या वतीने गोवा संघटना विसर्जित केल्यानंतर पक्ष सर्व जबाबदाऱ्या नव्या पदाधिकाऱ्यांकडे सोपवू शकतो. काही विद्यमान पदाधिकाऱ्यांना बदलले जाऊ शकते.

2022 च्या विधानसभा निवडणुकीत आम आदमी पक्षाला केवळ एक जागा मिळाली होती. पक्षाच्या या कामगिरीबाबत वरिष्ठ वर्तुळात नाराजी होती.

दरम्यान, काही दिवसांपुर्वीच केजरीवाल यांना गोवा पोलिसांनी एका गुन्ह्यात उपस्थित राहण्याबाबत नोटीस पाठवली होती. नंतर केजरीवाल त्या विरोधात कोर्टात गेल्यावर पोलिसांनी तीनोटीस मागे घेतली होती.

पुढील वर्षी लोकसभेची निवडणूक होणार आहे. त्या पार्श्वभुमीवर आपने आत्तापासून तयारीला सुरवात केली आहे. त्यासाठी गोव्यात नवी संघटनात्मक बांधणी करण्याचा निर्णय पक्षाने घेतला आहे.