मडगाव: महिलांना स्वतःचे असे सक्षम व्यासपीठ तयार करून देण्यासाठी आणि त्यांच्या स्वप्नातील गोवा साकार करण्यासाठी ‘गोमन्‍तक’ने हाती घेतलेल्या ‘जनमन उत्सव’ सर्वेक्षणाला (Janman Utsav survey) शहरी तसेच ग्रामीण भागांतून उत्स्फूर्त प्रतिसाद मिळत आहे. महिला स्वतःहून पुढे येऊन या उपक्रमात सहभागी होऊ लागल्या आहेत. आज गुरुवारी नावेली येथे झालेल्या सर्वेक्षणात आम आदमी पक्षाच्या नेत्या आणि राज्य कार्यकरिणीच्या उपाध्यक्ष प्रतिमा कुतिन्‍हो या सहभागी झाल्या. ‘गोमन्‍तक’च्या या आगळ्यावेगळ्या उपक्रमाचे स्वागत करताना ही जबाबदारी एका वृत्तपत्राने उचलली आहे हे कौतुकास्पद असल्याचे त्या म्हणाल्या.

या उपक्रमात ‘आप’च्या नावेलीतील युवा आघाडीच्या नेत्या सौम्या आदम यांनीही सहभाग घेतला. रातवाडो, नावेली, डोंगरी, रुमडामळ या भागांतील महिलांनी सर्वेक्षणात भाग घेतला. मुरगाव मतदारसंघात सडा परिसरातही हे सर्वेक्षण सुरू आहे. तेथे स्थानिक महिला वकील आश्विनी भोमकर यांनी सहभाग घेतला. तारीवाडा, श्री महादेव मंदिर, बीआरजी कॉलनी, सडा जेल परिसर, सडा जेटी परिसर येथे हे सर्वेक्षण करण्यात आले. दरम्‍यान, केपे मतदारसंघात किटला, फातर्पा, खोला तसेच काब-द-राम येथे हे सर्वेक्षण झाले.