पणजी: दिल्लीच्या माजी मुख्यमंत्री आतिषी यांची गोव्याचे प्रभारी म्हणून नियुक्ती करण्यात आली आहे. आम आदमी पक्षाच्या वतीने शुक्रवारी (२५ जुलै) आतिषी यांच्या नियुक्तीचे आदेश जारी केले आहेत. पंकज गुप्ता यांच्या आजारपणामुळे आतिषी यांच्या तात्काळ प्रभावाने नियुक्ती करण्यात आली आहे.

गोव्याचे प्रभारी पंकज गुप्ता गेल्या काही दिवसांपासून आजारी असल्याने आतिषी यांची नियुक्ती करण्यात आली आहे. पक्षाच्या अधिकृत एक्स अकाउंटवरुन याबाबत माहिती देण्यात आली आहे.

आतिषी यांनी भाजपवर हल्लाबोल करताना, भाजप सूडाचे राजकारण करत असल्याचा आरोप केला. भाजप केंद्रीय यंत्रणांचा राजकारणासाठी गैरवापर करत आहे. या यंत्रणांच्या मदतीने छापेमारी करुन देखील भ्रष्टाचाराची एकही घटना न सापडल्याने भाजप आता आपच्या नेत्यांविरोधात खोट्या केसेस तयार करत आहेत. आपने भाजपच्या छुप्या अजेंड्यांचा पर्दाफाश केल्याचे आतिषी म्हणाल्या.

केजरीवाल यांच्यानंतर दिल्लीचे अल्प कालावधीसाठी मुख्यमंत्रीपद भूषविलेल्या आतिषी सध्या दिल्ली विधानसभेच्या विरोधी पक्षनेत्या आहेत. भाजपने ईडीच्या मदतीने आप नेत्यांना त्रास देण्यास सुरुवात केल्याचा आरोप त्यांनी केला. सर्वोच्च न्यायालयाने देखील भाजप ईडी, सीबीआई यासारख्या केंद्रीय यंत्रणांचा गैरवापर करत असल्याचा ठपका ठेवल्याचेही आतिषी म्हणाल्या.

गुजरातमधील विसावादार पोट निवडणुकीत आपच्या उमेदवाराचा पराभव करण्यात भाजपला अपयश आल्याने आता ईडीच्या मदतीने आप नेत्यांच्या केसेस पुन्हा सुरु केल्या जात आहेत. भाजपने या पोट निवडणुकीत बक्कळ पैसा खर्च केला. शिवाय ड्राय राज्यात पोलिसांच्या मदतीने दारु देखील वितरीत केली. आपच्या कार्यकर्त्यांना धमकी दिली तसेच, उमेदवाराला त्रास दिला तरी देखील आपचा उमेदवार बहुमताने विजयी झाला, असे आतिषी म्हणाल्या.