Goa Police: कळंगुटमध्ये छत्रपती शिवाजी महाराजांचा पुतळा उभारण्यावरून झालेल्या वादानंतर मंगळवारी सायंकाळी सोशल मीडियातही या प्रकरणाचे पडसाद उमटले होते. एका युवकाने शिवाजी महाराजांविषयी सोशल मीडियात आक्षेपार्ह पोस्ट केली होती. त्याला पोलिसांनी ताब्यात घेतली आहे.

रोनाल्डो डिसुझा असे या युवकाचे नाव आहे. तो वाडे, वास्को येथील आहे. त्याने शिवाजी महाराजांच्या पुतळ्यावरून झालेल्या वादावर सोशल मीडियात भाष्य केले होते. त्यातून ज्यांना पुतळे हवे आहेत त्यांनी स्वतःच्या घरात बसावावेत, तसेच इतर ठिकाणचे सर्व पुतळे फोडून टाकावेत, अशा स्वरूपाची पोस्ट केली होती.

ही पोस्ट हिंदू समुदायाच्या भावना दुखावणारी होती. त्यामुळे हिंदू समुदायातून या युवकाविरोधात कारवाईची मागणी करण्यात आली होती. या युवकाला तत्काळ अटक करावी, अशी मागणी केली गेली होती.

पोलिसांनीही याची तत्काळ दखल घेत दोन समाजात तेढ निर्माण करणारी पोस्ट केल्यावरून संबंधित युवकास अटक केली आहे. वास्कोचे पोलिस निरीक्षक कपिल नायक याबाबत अधिक तपास करत आहेत.