आज सकाळी म्हापसा- धुळेर येथील लँडमार्क बिल्डिंगच्या मागील बाजूस असलेल्या सुपरमार्केटच्या जनरेटरला आग लागल्याची घटना घडली. अग्निशामक दल वेळीच घटनास्थळी पोहोचल्याने आगीवर नियंत्रण मिळवण्यात यश आलंय.

या दरम्यान तेथील वीज पुरवठा खंडित असल्याने मोठी दुर्घटना टळल्याचे अग्निशामक दलाच्या कर्मचाऱ्यांनी सांगितले. अग्निशामक दल वेळेवर न पोहोचल्यास लाखोंची हानी झाली असती.

या भागात रहिवासी राहत असून त्यांनी देखील आग विझवण्यात मदत केल्याचे त्यांनी सांगितले. या दुर्घटनेत कोणतीही जीवित हानी झाली नसून जनरेटर आणि इलेक्ट्रिक पॅनल असे मिळून सुमारे वीस हजारांचे नुकसान झाल्याचा प्राथमिक अंदाज अग्निशामक दलाच्या कर्मचाऱ्यांनी वर्तवला आहे.

मागील दीड - दोन आठवड्यापासून गोव्यात आग लागण्याचे प्रमाण काहीसे कमी झाले होते. मात्र आज पुन्हा देवलामाळ- कुडचडे येथील जंगलाला देखील आग लागल्याची प्राथमिक माहिती प्राप्त झाली आहे. अग्निशामक दल घटनास्थळी पोहोचले असून त्यांचे आगीवर नियंत्रण मिळवण्याचे प्रयत्न सुरु आहेत. हि आग कशी लागली, किती वाजता लागली या बाबत अद्याप माहिती उपलब्ध झाली नाही.