दोनापावल येथील मणिपाल इस्पितळाजवळील वळणावर काल पहाटेच्या सुमारास मोठ्या ट्रकच्या चालकाचे नियंत्रण जाऊन उलटून झालेल्या अपघातात चालकासह पाचजण जखमी झाले. हा अपघात पहाटे 5च्या सुमारास घडला.

या ट्रकमधील दोघांना लोकांनी तर आतमध्ये अडकलेल्या एकाला अग्निशमन दलाच्या जवानांनी बाहेर काढले. या जखमींना किरकोळ उपचारानंतर घरी पाठवण्यात आले. रात्रीच्यावेळी हा अपघात घडल्याने सुदैवाने मोठी दुर्घटना टळली.

अग्निशमन दलाच्या अधिकाऱ्यांनी दिलेल्या माहितीनुसार लोखंडचे सामान असलेली मोठी ट्रक दोनापावल येथून बांबोळीच्या दिशेने जात होती. लॉरीमध्ये लोखंडी सामान होते. ही ट्रक मणिपाल इस्पितळाच्या रस्त्यावरील वळणावर पोहचली असता चालकाला या वळणाचा अंदाज आला नाही व त्याचे नियंत्रण सुटले. त्यामुळे लोखंडी सामाने भरलेली लॉरी उलटली.

अपघात घडताच चालकासह इतर चौघेजण आतमध्ये अडकले. त्यातील दोघांनी या लॉरीमधून बाहेर येण्यास यशस्वी झाले. या अपघाताच्या आवाजाने आजूबाजूचे लोक जागे झाले. इतर तिघेजण ट्रकमध्ये अडकून पडले होते. लोकांनी त्यातील दोघांना बाहेर काढण्यास यश मिळवले.