Truck Accident in Goa: शेळ-शिवोली येथे रस्ता हॉटमिक्सिंग सुरू असताना ट्रकचा धक्का बसल्याने कामगाराच्या सहा वर्षीय बालकाचा करुण अंत झाला.

सनदी विरेश लमाणी (रा. पर्वरी, मुळ रा. कर्नाटक) असे या चिमुकल्याचे नाव आहे. ही घटना आज सोमवारी सायंकाळी 4 च्या सुमारास घडली.

रस्ताकामासाठी ट्रकमधून रस्त्यावर टाकण्यासाठी खडीमिश्रित डांबर आणण्यात आले होते. घटना घडली तेव्हा ट्रकचालक रिव्हर्समध्ये ट्रक मागे घेत होता. यावेळी हा सनदी रस्त्याच्या बाजूला झोपलेला होता.

ट्रकच्या आवाजाने त्याला जाग आली आणि जागेवरून उठण्याच्या प्रयत्नात सनदीचे डोके ट्रकला आदळले. त्यामुळे त्याच्या कानाजवळ गंभीर दुखापत होऊन जागीच त्याचा मृत्यू झाला. या घटनेमुळे परिसरात हळहळ व्यक्त होत आहे.

सकाळी कामाला प्रारंभ अन्...

सोमवारी सकाळी शिवोलीच्या आमदार दिलायला लोबो यांच्या हस्ते या हॉटमिक्सिंगच्या कामाला सुरवात झाली होती. त्यानंतर संध्याकाळी चारच्या दरम्यान ही दुर्दैवी घटना घडली.

ज्या ठिकाणी ही घटना घडली तेथून जवळ भूमिगत वीज वाहिन्या टाकण्याचे काम सुरू होते. तेथे काम करणाऱ्या कामगाराचे हे मूल होते. या प्रकरणी पोलिसांनी ट्रकचालक सुदेश नारायण विर्नोडकर (50, रा. सडये-शिवोली) याला अटक करण्यात आली आहे.