सध्या देशी-विदेशी पर्यटकांना मारहाण करण्याच्या घटना वारंवार घडत असल्याने पर्यटन क्षेत्र बदनाम होत आहे. त्यातच मोरजी येथील इन ग्रँड या हॉटेलमध्ये वास्तव्यास असलेल्या पर्यटक रशियन महिलेला दोन कामगारांनी मारहाण केल्याची तक्रार 24 रोजी पेडणे पोलिस स्थानकात नोंद केली.

महिलेच्या तक्रारीनुसार, या हॉटेलमधील कामगार अविनाश गोरिया (वय 29, रा. बदलापूर) आणि मोहम्मद फैजल खान (वय 26, रा. झारखंड) या दोघांवर पेडणे पोलिसांनी गुन्हा नोंद करून त्यांना अटक केली.

पेडणे पोलिसांनी दिलेल्या माहितीनुसार, मोरजी येथील इन ग्रँड हॉटेलमध्ये आयगल दावेल्तिनोवा ही 30 वर्षीय पर्यटक रशियन महिला वास्तव्य करून होती. 24 रोजी तीन वाजता ती राहात असलेल्या रूमच्या खिडकीतून दोन कामगारांनी प्रवेश करून तिचे नाक-तोंड दाबून तिला मारण्याचा प्रयत्न केला.

त्यानंतर तिने आरडाओरडा केल्याने आजूबाजूचे पर्यटक जमले. त्यानंतर हे दोघेही संशयित पळून गेले. तक्रारदार महिलेने पेडणे पोलिस स्टेशनवर तक्रार नोंदवल्यानंतर पोलिसांनी दोन्ही संशयितांना ताब्यात घेऊन त्यांच्यावर भादंसं कलम 325 आणि 34 आयपीसी अंतर्गत गुन्हा नोंदवून त्यांना अटक केली.

या प्रकरणाचा पुढील तपास पेडणे पोलिस स्थानकाच्या महिला उपनिरीक्षक सुमेधा नाईक या पोलिस उपअधीक्षक राजेश कुमार आणि पोलिस निरीक्षक दत्ताराम राऊत यांच्या मार्गदर्शनाखाली करत आहेत.