Goa Pipeline Burst: चरावणे सत्तरी भागात आधीच कमी आणि नियमित पाणीपुरवठ्याची तक्रार सतत होत असते. पाणीटंचाईचा मोठा त्रास या भागातील ग्रामस्थांना सहन करावा लागतो. त्यातच आता येथे पाणीपुरवठा करणारी एक पाईपलाईन फुटून हजारो लीटर पाणी वाया गेले आहे.

चरावणे भागात एप्रिल महिन्यात मोठ्या प्रमाणात पाणी टंचाई भासते. मात्र चरावणे गावात तीन चार ठिकाणी पाण्याची पाईपलाईन कित्येक दिवसापासुन फुटली असून त्यातून पाण्याची गळती होत आहे. गळतीच्या प्रमाणात अनेक ठिकाणी वाढ झाली आहे. त्यातून हजारो लीटर पाणी वाया जात आहे.

याबाबत ग्रामस्थांनी संबंधित अधिकाऱ्यांकडे तक्रार केली आहे. पण या तक्रारीकडे अधिकाऱ्यांचे दुर्लक्ष झाले आहे. एका बाजूने पाणी वाया जात आहे. तर दुसऱ्या बाजूला पाण्याविना नागरिकांचे हाल होत आहेत. काही भागात तर केवळ काही तासांसाठी एकदाच पाणी सोडले जाते.

त्यात आता ही पाईपलाईन फुटल्याने उंचावरील भागात पाणीच चढत नाही. त्यामुळे तातडीने या पाईपलाईनची दुरूस्ती करून पाणीपुरवठा सुरळीत करावा, अशी मागणी होत आहे.