सांगे येथील वरकटो भागातील एका बंद फॅक्टरीला भीषण आग लागल्याची घटना घडलीय. कुडचरकर फॅक्टरी असे या कारखान्याचे नाव असून या फॅक्टरीत मॅगनीजवर प्रक्रिया करण्याचे काम चालत होते अशी प्राथमिक माहिती मिळाली आहे.

ही घटना आज संध्याकाळी 4 च्या सुमारास घडलीय. सुरुवातीला येथील स्थानिकांनी आग विझवण्याचे प्रयत्न केले मात्र फॅक्टरी शेजारी सुके गवत, कचरा, काजूची झाडं, माड बागायती असल्याने काही वेळातच आगीने उग्र रूप धारण केले. सदरचे वृत्त समजताच कुडचडे येथील अग्निशामक दल घटनास्थळी दाखल झाले.

आगीत फॅक्टरीतील लाकूड सामान, जुन्या वस्तू आगीच्या भक्षस्थानी पडल्या. या आगीची तीव्रता एवढी होती कि, फॅक्टरीवरील पत्रे देखील आगीच्या दाहकतेमुळे फुटले. या फॅक्टरी शेजारी शाळा तसेच लोकवस्ती असल्याने आग वेळीच नियंत्रणात आली नसती तर फार मोठा अनर्थ घडला असता.

अद्यापही आगीवर पूर्णपणे नियंत्रण मिळवता आलेलं नाहीय. धक्कादायक म्हणजे फॅक्टरी शेजारीच 11 हजार व्होल्टेजच्या विजेचा खांब होता. मात्र परिस्थितीचे भान राखत स्थानिकांनी या विजेच्या खांबानजीकच्या आग तातडीने विझवली.

कुडचडे येथील अग्निशामक दलाने आगीवर नियंत्रण मिळवण्यासाठी प्रयत्नांची पराकाष्ठा केली. आग विझवण्यासाठी तब्बल 2 बंब वापरण्यात आल्याची माहिती अग्निशामक दलाच्या कर्मचाऱ्यांनी दिली. आगीत नेमके किती नुकसान झालेय याची माहिती मिळू शकली नाहीय.