Goa Leopard Rescued from well: उत्तर गोव्यातील शिरसोडे येथे एक पुर्ण वाढ झालेला बिबट्या विहरीत पडला. वाळपई येथील वन खात्याच्या कर्मचाऱ्यांनी महत्प्रयासानंतर बिबट्याला बाहेर काढले. त्याला सुरक्षित अधिवासात सोडले जाणार आहे.

म्हादई अभयारण्य क्षेत्राजवळ शिरसोडे हे गाव आहे. या गावात पहाटेच्या सुमारास नर जातीचा बिबटा भक्ष्याच्या शोधात लोकवस्तीत आल्याचा अंदाज आहे. बिबट्या दयानंद गावकर यांच्या घराजवळील विहिरीत पडला. सकाळी दयानंद गावकर यांना ही बाब समजल्यावर त्यांनी वन खात्याला याची माहिती दिली.

म्हादई अभयारण्य क्षेत्रातील कर्मचारी तसेच अधिकारी गौरीश बैलुंडकर व वाळपई वनखात्याचे आरएफओ श्यामसुंदर गावस यांच्या मार्गदर्शनाखाली अथक परिश्रमानंतर बिबट्याला जिवंत बाहेर काढण्यात यश आले.

बिबट्या विहिरीत पडल्याने गावात एकच खळबळ उडाली होती. वनविभागाच्या कर्मचाऱ्यांनी शर्थीने परिश्रम घेऊन त्याला वर काढले. विहिरीत पाणी कमी असल्याने वाघाला काही झाले नाही. बिबट्याला जेरबंद केल्रयानंतर वाळपई येथे त्याची वैद्यकीय तपासणी केली गेली.

हा बिबटा सहीसलामत असल्याचे डॉक्टरांनी सांगितले. संध्याकाळी त्याला सुरक्षित स्थळी सोडण्यात येणार आहे.

म्हादई अभयारण्य क्षेत्रात बिबटा तसेच इतर वाघाचा वावर सातत्याने होत असतो. बिबट्या लोकवस्तीत येणे हे काही नवीन नाही. एप्रिल-मे महिन्यात जंगल भागात पाणी तसेच इतर भक्ष्याच्या शोधात वन्यप्राणी वस्तीत येत असतात.

त्यात काही दिवसापुर्वी म्हादई अभयारण्य क्षेत्रात आगीमुळे मोठ्या प्रमाणात वन्य जैवीक वनस्पती नष्ट झाली आहे. या कारणाने सुध्दा वन्य प्राणी जंगलातून लोकवस्तीकडे येऊ शकतात. बिबट्याला सुरक्षित बाहेर काढून त्याला जीवदान दिल्याबद्दल नागरिकांनी समाधान व्यक्त केले.

यावेळी बोलताना दयानंद गावकर म्हणाले की, शिरसोडे येथे पाण्यााची समस्या आहे. बिबट्यामुळे विहिरीतील पाणी दुषित झाले आहे.