Dead Body in Goa Jungle: गोव्यातील पेडणे तालुक्यात तोरशे येथे शेट्येवाडो जवळील जंगलात एक कुजलेल्या अवस्थेतील मृतदेह आढळून आला आहे. या मृतदेहाची ओळख पटलेली नाही. पोलिसांनी हा मृतदेह ताब्यात घेऊन शवविच्छेदनासाठी पाठवलेला आहे.

शेट्येवाडो परिसरात असलेल्या जंगलातून दुर्गंधी येऊ लागली होती. येथून ये-जा करणाऱ्या स्थानिकांच्या ही बाब लक्षात आली. दुर्गंधीमुळे येथून ये-जा करणेही मुश्किल झाले होते. तेव्हा काही स्थानिकांनी शोध घेतला असता कुजलेल्या अवस्थेतील मृतदेह आढळून आला आहे.

याबाबत स्थानिकांनी मोपा पोलिसांना माहिती दिली. त्यानंतर पोलिसांनी घटनास्थळी येऊन पाहणी केली. त्यांनी हा मृतदेह ताब्यात घेतला आहे. मोपा पोलिस ठाण्यात याबाबत अनैसर्गिक मृत्यू म्हणून गुन्हा दाखल झाला आहे.

हा मृतदेह उत्तरीय तपासणीसाठी गोवा मेडिकल कॉलेज रूग्णालयात पाठविण्यात आला आहे.